Doktoresha e parë në fushën e Tefsirit!

0
162

Kosovës së fundmi i është shtuar edhe një doktor shkence, por kësaj radhe bëhet fjalë për një femër e cila ka arritur që të marrë titullin doktor shkence në një prej Universiteteve të Jordanisë. Ajo kështu bëhet doktoresha e parë në fushën e komentimit dhe shpjegimit të Kuranit pra, është tefsirologia e parë femër në Kosovë.

Florentina Termkolli, ka arritur që para komisionit të përbërë nga profesore eminent të Jordanisë të mbrojë desertacionin e doktoraturës me titull ‘’Shkaqet e zbritjes së Kuranit tek sekularistët dhe bashkëkohorët, ajo si mentor kishte Prof. Dr. Xhemal Ebu Hassanin.

Por, kush është Florentina Termkolli?

Florentina Termkolli është lindur në vitin 1983 në fshatin Dumosh të Podujeves. Shkollimin fillorë e kryen në fshatë ndërsa atë të mesëm e vazhdon në Medresenë e Mesme Alauddin në Prishtinë. Ajo përfundon shkollën e mesme me sukses mjaftë të lartë dhe ishte nxënëse e gjeneratës së parë të paralelës së femrave pranë kësaj medreseje. Pas përfundimit të shkollimit të mesëm ajo në vitin 2002 udhëton për të vazhduar studimet në Jordani. Motivë dhe shtytës kryesorë për të tejkaluar të gjitha vështirësitë që mund të hasë një femër në rrugën e shkollimit dhe për të marrë rrugën e mërgimit për në viset e largëta të lindjes së mesme ia kishte mundësuar vetëdijësimi i saj i hershëm rreth rëndësisë së shkollimit dhe arsimimit të femrës. E që në lidhje me këtë ajo vetë prononcohet duke thënë ‘’Leximi ndihmon në emancipimin dhe arsimimin e femrës, e arsimimi i saj do të thotë edukimi i familjes ndërsa nëse kemi familje të edukuar do të kemi edhe shoqëri të arsimuar. Arsimimi i shoqërisë nënkupton ngritjen e saj mbi vlera dhe vyrtyte të shëndosha’’.

Ajo, rrugën e arsimimit jashtë vendit e ka filluar në vitin 2002 kur edhe udhëton për herë të parë për në Jordani. Me të arritur atje, Florentina fillon që të mësojë gjuhën arabe për të vazhduar më pas studimet në fakultetin e Sheriatit, e pas përfundimit të tij vazhdon edhe masterin në drejtimin e Tefsirit. Dhe, tërë këtë e finalizon me marrjen e titullit doktor shkence.

Çdoherë kishte treguar suksese, zell dhe përkushtim për të mësuar, për të përthithur sa më shumë dituri dhe këtë e dëshmon vetë zellshmëria e saj në mësimet private që kishte marrë pranë dijetarit dhe kolosit të njohur me origjinë shqipëtare Shuajb el-Arnautin, tek i cili kishte filluar të mësonte që nga ditët e para të shkuarjes së saj në Jordani e deri në ditët e fundit të jetës së dijetarit të mirënjohur.

Florentina, tregon për përkrahjen e madhe që kishte nga familja e saj edhe përkundër vështirësive që ajo mund të haste si studente jashtë vendit. Një përkrahje të veçantë e kishte nga babai i saj, Allahu xh.sh e mëshiroftë, prandaj edhe e falënderon në mënyrë të veçantë dhe për të cilin lutet vazhdimishtë. Ajo tanimë është edhe një bashkëshorte e përkushtuar për familjen e saj dhe në veçanti për djalin e saj Durranin. E pyetur për vështirësitë e saja deri tek titulli doktor shkence ajo tregon: Me të vërtetë është një rrugë e mundimshme, e në veçanti pasi që jam bërë nënë ngase bashkëshorti Kushtrimi, të cilin e falënderojë shumë, i është dashur të bartë barrën e prindit të dyfishtë. Pra, ai ishte edhe baba edhe nënë në të njëjtën kohë dhe tërë këtë e bënte në mënyrë që mua të më mundësonte të përkushtohesha në përgatitjen e desertacionit të doktoraturës. Po të mos ishte përkrahja nga mbarë familja unë nuk do kisha as gjasat minimale që sot të jem këtu ku jam andaj falënderojë tej mase që të gjithë ata që më kanë përkrahur në rrugëtimin timë.

Ajo, ishte si mësuese dhe ligjeruese në shumë kurse verore për femra të organizuara në Kosovë. Tani, pas përfundimit të doktoraturës, mendon të kthehet në Kosovë dhe të vihet në shërbim të edukimit dhe arsimimit të femrës myslimane shqipëtare. Ajo dhe tregimi i suksesit të saj dëshiron që të kthehet në një motivë dhe një shtytës për të gjitha femrat shqipëtare në rrugëtimin e tyre drejt arsimimit. E po ashtu si një dëshmi për të gjithë ata që mendojnë se femra myslimane është një femër e prapambetur dhe se të jesh e mbuluar do të thotë të jesh e paarsimuar, gjë që ajo praktikishtë e dëshmon të kundërtën e këtyre spekulimeve.

Doktoreshës më të re të shkencave islame i dëshirojmë çdo të mirë në jetë dhe suksese të mëtutjeshme.

Përgatiti: Mr. Artan Musliu

LEAVE A REPLY

Please enter your comment!
Please enter your name here