PO NUK PATE TURP, BËJ Ç’TË DUASH!
Turpi është degë nëpërmjet së cilës manifestohet imani. Mu për këtë ka ardhur porosia e fuqishme profetike për të kultivuar këtë virtyt i cili sjell shumë dobi dhe përfitime në jetë.
Mund të duket gjë e thjeshtë por e vërteta interesante qëndron në faktin se turpërimi ishte porosi e të gjithë të dërguarëve për popujt e tyre. Pra, është porosi hyjnore për njerëzimin të cilën ata, ndër gjërat e rralla e kanë trashëguar dhe përcjellur breza e gjenerata.
Thotë i Dërguari i Allahut:
“Gjëja e fundit që është trashëguar nga porositë e hershme profetike është: Nëse nuk turpërohesh, bëj çfarë të duash.” (Buhariu)
Këtë e kanë përcjellur njerëzit edhe pa e ditur se është porosi e kahmotshme profetike. Si duket, kjo është ndër pikat e shumta ku takohet shpallja me natyrshmërinë dhe arsyen.
