Jemi në muajin prill dhe siç e shikoni tregu është i mbushur plot me fruta-perime. Tregtarët thonë se të gjitha këto produkte prodhohen në vend. Shpesh flitet për përdorim të hormoneve në këto produkte.
Por a është e vërtetë kjo dhe çfarë duhet të dijë më shumë qytetari për konsumin e tyre? Vetëm për të nxjerrë në treg 10 ditë më herët produktet e tyre, fermerët përdorin stimulantët që përshpejtojnë rritjen dhe maturojnë më shpejt frutin.
Stimulanti që përdoret më shpesh në sera është ethreli, një lloj gazi që transformon ngjyrën e perimes. Specialistët e bujqësisë sqarojnë se ky medikament nuk është hormon, por rregullator i procesit të rritjes që përdoret në kushtet kur bimës i mungojnë temperatura dhe lagështia e nevojshme.
Për eksperten e fushës, Liri Miho, stimulantët duhet të përdoren në kohën dhe dozën e duhur pasi, sipas saj, nëse abuzohet përbëjnë rrezik për shëndetin e njeriut.
Por specialistët në Ministrinë e Bujqësisë shpjegojnë se fermerët kryesisht ata në Myzeqe nuk mund të abuzojnë me këtë stimulant pasi përdorimi i tepërt do të thante bimët dhe kjo nuk është në interesin e tyre.
Profesor Jani siguron konsumatorët se prodhimi vendas është i sigurt dhe i kontrolluar në çdo hallkë të tij, nga serat e deri në tregje.
Megjithatë për ata që nuk kanë besim në konsumin e perimeve, mund të bëjnë dallimin e tyre me sy në treg. Kur një perime është e deformuar apo mbi të vërehen njolla të verdha tregon se tek bima është përdorur stimulant./fermaime/